Khawvel ecocomy a nghawng chho mek

Covid-19 hian khawvel economy nghawng chhoin financial marking a khawih tel mek bawk a, hei vang hian  Thawhlehni khan United States Federal Reserve chuan kum 2008-a khawvelina a tawh global financial crisis hnuah a vawi khatna turin interest rate chu 0.50% (50 basis points) ah a ti hniam. Hei vang hian ramchhunga bank-ten pawisa an pekchhuah theih zat a tam theih phah rin a ni bawk. 

US bakah hian Reserve Bank of Australia chuan interest rate hi 0.5% ah a tihniam ve bawk a, Malaysia central bank 'Bank Negara Malaysia' pawhin interest rate hi 2.5% in a tihniam bawk. Khawvel ram hrang hranga Central bank-in interest rate a tih hniam chhan hi sum chevel a tam theih nan tih a ni. He hri darh zel vang hian insumdawn tawnnaah khuahkhirhna siam a ni a,  hei vang hian sum leh paiah harsatna a awm chho zel a, sumdawngten hlawkna an tel tur ang pawh an tel ṭha hlei thei tawh a lo a ni. 

G7 group member-a central banker leh finance minister-te pawh US-ah inhmukhawmin, Covid-19 hri darh zel ven leh thunun a nih theih nan hian a theih ang anga hmalak an tum bakah, an inpeih thu an tarlang. Member ram 36 awmna Organisa-tion for Economic Cooperation and Development (OECD) chuan kum 2020 khawvel economic growth rate chu 2.4% a nih an rinthu an tarlang. Indopui pahnihna hnua khawvel economic growth hniam ber ṭum chu 2009 kha a ni a, kha mi ṭum khan growth rate chu 2.5% a ni. OECD hian 2009 aiin kumina economic growth rate tur hi a hniam zawk an ring a ni.