Myanmar security force-ten rail worker-te in dap

Myanmar security force-te chuan nimin khan sipai rorelna duh lohna lantira nawrh huaihawt zawmtu, railway worker-te chu Yangon-a staff compound-ah hualin, an chenna inte an dapsak. 

Police-te hian Yangon-a Mingalar Taung Nyunt hmun, Ma Hlaw Kone train station leh railway worker-te chenna hmun chu tlawhpawh theih lohin an dang a, hnathawktute chenna inte hi an dap zui a ni. Mi pathum an man nia sawi a ni a, mahse finfiah theih a ni rih lo. 

Railway sorker-te hian  mipuiten sipai thuneihna duh lohna lantir leh, civil sorkar hnena thuneihna pe let leh tura phuta civil disobedience movement an kalpui chu an zawm a ni. Trade union hrang hrangten sipaite nawrna atana an ram economy shutdown tura hnathawktu hrang hrangte an hna thawk chhunzawm tawh lo tura ngenna thuchhuah an siamah pawh Myanmar Railway Worker’s Union Federation an tel a ni. Mahse thuchhuah an siam hnu lawkah railway worker chenna hmun chu security force-te hian luhkhungin an dap zui ta a ni. 

National League for Democracy (NLD) official, Zaw Myat Linn chu man a nih hnuah Thawhlehni khan police-te kuta a awm laiin a thi. Police-ten an hren laia NLD official thi pahnihna a ni. Pathianni khan NLD campaign manager Khin Maung Latt chu a lo thi tawh bawk. 

Zaw Myaat Linn hi sipai sorkarin a ṭhiah tak, Parliament upper house-a member a ni. Thawhlehni zing khan man a ni a, hemi zan vek hian a thi zui ta a ni. A chhungte chu a ruang la tur hian hriattir an ni a, a thihna chhan erawh engmah hriattir an ni lo thung. A ṭhianṭha tak, activist Maung Saungkha chuan a pumah hliam na tak a tuar tih a sawi a, mahse sipaite chuan hei hi tlanchhuah tuma banga a lawnnaah a tihnat niin an sawi thung. 

Assistance Association for Political Prisoners (AAPP) chuan February 1-a sipaiten civil sorkar thuneihna an hnehchhuh avanga ram chhung hmun hrang hranga nawrh huaihawt a nih hnuah, mi 60 chuang an thi tawh a, mi 2,000 dawn man an ni tawh bawk niin a tarlang. 

United Nations Security Council chuan Myanmar sipai sorkar leh, nawrh huaihawtte chunga sipaite chet dan chungchanga demna thuchhuah a la siam thei lo. 

Britain-in resolution draft a siam chu UNSC member-ten an sawiho hnuah, China, Russia, India leh Vietnam chuan Thawhlehni khan siamṭhat leh phawt an rawt a ni. Draft siamṭhatna tura an rawt zingah hian sipai chakna hmanga thuneihna paihthlak tih leh, action na zawk lakna tura vauna thu tarlante chu siamṭhat an rawt tel. 

Resolution siam tur chungchang hi an sawiho chhunzawm leh dawn nia sawi a ni a, member ram 15-ten lungrual taka an pawm a ngai a ni.