Tennessee-ah thlipui tlehin chhiatna a thlen nasa
United States-a Tennessee khawpui Nashville-ah thlipui, tornado tleh vangin mi 25 an thi tih Nashville Emergency Operations Centre chuan a tarlang.
He thlipui tleh hian John C Tune Airport leh bungraw tam tak a tihchhiat bakah, chenna in leh lo a tichhe nual bawk. Nashville-a thlipui tleh hi Putnam County-ah a na ber a, kilometre 130 (80 miles) a chakin thlipui hi a tleh a ni. County-ah hian mi 19 lai an thi.
Wilson County-ah mi pathum an thi bawk a, Davidson County-ah mi pahnih leh Benton-ah mi pakhat an thi bawk a ni. Mi 150 velin hliam an tuar bawk a ni. Nashville-a thlipui tleh vang hian mi 44,000 velin electric power supply an nei lo nghal a,chhanchhuah hna hi thawh mek a nih vangin thi leh hliam zat pawh hi an la pun chhoh rin a nih thu state Emergency Community Relations Officer Maggie Hannan chuan a sawi.
President Donald Trump chuan chhiatna thlenna hmun hi naktuk hian tlawh a tum a, thi leh hliam tuarte a tawrhpui thu leh he thil thleng hi pawi a tih thu a sawi bawk. Nashville-a chhiatna thleng vang hian school, court leh inkalpawhna hmun hrang hrang chu Thawhlehni khan khar a ni.