China-in G20-ah Hong Kong chungchang sawi remti lo

China chuan Zirtawpni aṭanga Osaka, Japan-a Group of 20 summit neih turah tunhnaia Hong Kong-a extradition bill dodala nawrh huaihawt chungchang chu sawiho a remti dawn lo tih a sawi. 

Hong Kong sorkarin thiam loh chantir tawhte mainland China-a thawn theihna tur bill, extradition bill a siam chu mipuiten dodalin hun eng emaw chen nawrh an huaihawt a, hei vang hian Hong Kong hotu Carrie Lam pawhin bill hi a titawp lailawk a ni. Mahse mipuite chuan bill hi ṭhiah tur leh, Lam pawh bang tura phutin an nawr zui a ni. 

US secretary of state Mike Pompeo chuan US president Donald Trump chuan G20 summit  neih hunah Hong Kong-a thil thleng chungchang hi China president Xi Jinping sawipui a tum thu a sawi. Mahse assistant foreign minister Zhang Jun chuan G20 hi economic issue sawina tur a nih vangin thil dang sawi a rem lo tih a sawi ve thung. 

Zhang chuan G20 chungchanga press mite a kawmnaah, he summit-ah hian Hong Kong buaina hi sawichhuah a ni dawn lo a, China chuan a remti dawn lo a ni, a ti. Hong Kong chungchang chu China ramchhung thil a ni a, ramdangten inrawlh turin dikna an nei lo, a ti.