September-ah Israel inthlang ṭha leh dawn

Israel ram inthlanpui, April thlaa neihah party mala sorkarna siam thei an awm lo a, seat la hnem ber, Likud Party hotu prime minister Benjamin Netanyahu chuan hun tiam chhunga ṭangrual sorkar siampui tur a tihfel theih tak loh vangin September thlaah inthlan neih ṭhat leh a ni dawn. 

Parliament inthlanah hian Blue and White party leh Likud Party-te chuan seat 120 awmna Parliament-ah seat 35 ve ve an la a, mahse Likud hian thawhpui dang a ngah zawk avangin sorkar siam turin hun pek a ni. Hun pek chhung hian Netanyahu chuan right-wing leh ultra-Orthodox party-te chu ṭangrual sorkar siam tumin thawhpui tum mah se, seat neih ngai zat chu seat khatin an pha thei lo a ni. Ṭangrual sorkar hmasaa tel, seat nga neitu Yisrael Beiteinu party chuan an zawm ve duh tawh lo a ni. Blue and White hian PM Netanyahu kaihhruai sorkarah chuan tel an duh lo tih an sawi bawk. Eptu party lian ber, Blue and White party hi sipai hotu hlui pathumten an kaihruai a, Netanyahu PM a nih dawn chuan Likud Party hi an thawhpui thei lo tih an sawi. 

Hei vang hian Netanyahu chuan Parliament a ṭhiat a, September 17-a inthlan ṭhat neih a ngai dawn ta a ni. Hei hi President-in party dangte sorkarna siam tura hun a pek tur danna atana a tih nia sawi a ni bawk. Hemirual hian a thawhpui dangte tan Parliament-a majority siam tumin an la bei leh a, September thlaa inthlan neih tur pawh cancel tir dan an ngaihtuah tih an sawi a; mahse hei hi danin a pawm theih dawn leh dawn loh hriat a ni lo. 

September thlaa inthlan neih tur thlirin Netanyahu dodaltu langsar tak, prime minister hlui Ehud Barak chuan nimin khan political party thar a din. Kum 77 mi, defence minister hlui ni bawk Barak hian news conference a neihah party thar a din thu hi a sawi a, Netanyahu kaihhruai sorkar chu paihthlak ngei a ngai tih a sawi. Party dangte pawh an ram inrelbawl dan thlak danglam tura thurualpui turin a sawm nghal. Barak party din thar hi a hming tarlan a la ni lo.