NKorea-in UN human rights report a dem

North Korea chuan US-in an rama human rights record leh religious freedom sawiselna report a tihchhuah chu a dem thu a sawi. 

NKorea Ministry of Foreign Affairs thupuangtu chuan thuchhuah siamin, US chuan human trafficking leh religious freedom chungchanga report a tihchhuah thar berah an ram chu dik lo taka a beih thu a tarlang. US-in an ram hrekna kalpuina tur, 'National Emer­gency' kum khat dang hman chhunzawm a tum chu a dem thu a sawi bawk. 

Ram pahnih hruaitute chuan inlaichinna ṭha zawk siam an duh thu sawi mah se, America politics chu NKorea dodaltuten an thunun chhunzawm zel a nih chuan inlaichinna ṭha leh Korean peninsula aṭanga nuclear ralthuam tihbo tuma hmalakna chuan hma a sawn thei dawn lo ang, tiin an thu­chhuah­ah an tarlang. 

Ministry thupuangtu chuan NKorea chu US-in a hrekna vanga tlawm mai tur a ni lo a, US-in a duh hun huna a beih tur a ni lo, a ti. "Kan thuneihna leh kan dikna chanvo rahbet tuma bei an awm a nih chuan kan invenhimna turin eng thil pawh kan ti hreh dawn lo," a ti.