Covid-19 do let turin kan inpeih : Trump
US president Donald Trump chuan White House-a press conference a neihnaah, khawvelina a buaipui mek Covid-19 hri leng mek do let turin US chu a in peih thu a sawi.
Press conference-ah hian Trump chuan an ramchhunga Covid-19 darh zel tur venna atana hnathawktute hotuah leh mawhphurtuah, vice president Mike Pence chu dah a nih thu a sawi bawk.
US Centers for Disease Control (CDC) chuan US-ah hian hri leng kai mi 60 an awm tawh thu tarlangin, heng zinga a tam zawk chu Japan tuipui kama lawng an hren, Diamond Princess cruise ship aṭanga US-a rawn haw tate an nih thu CDC chuan a tarlang bawk.
US-ah hian he hri leng kai hi mi 60 an awm tawh tih CDC chuan tarlang mah se, Trump chuan he hri leng hi an ramah chuan a darh zel loh nana ven hneh theih a nih thu chanchinbumite hmaah a sawi. Trump kaihhruai sorkar chuan US-ah hian public health emergency an puan bakah, rampawn aṭanga US-a zin lut turte khuahkhirh an ni bawk a, natna laka inven nana ram dang lawng lo hrensakna thupek pawh an chhuah bawk a ni.
He hri leng kai hi US-ah chuan California-ah an awm tih hriatchhuah hmasak ber a ni a, CDC chuan engtin chiahin nge an rama Covid-19 kaiten he hri hi an kai theih dan an la sawi chiang thei bik lo.
Ramchhunga Covid-19 hri leng vang hian US leh South Korea-in military exercise an neih tum pawh ṭhulh phah a ni a, China tih lohah chuan SKorea-ah hian he hri kai hi an tam ber bawk a ni.
China aiin Europe, Middle East leh ramdangah darh chakCovid 19 hri rawn irh chhuahna China mai nilo ramdangah pawh he hri hian bu a khuar zel a, Europe-a Sweden, Norway, Greece-ah pawh a darh belh tih hriatchhuah a ni a, Middle East-ah pawh he hri kai hi mi 200 an tling tawh. He hri hi China aiin ramdangah a darh chak zawk tih tarlan a ni.
China ram, mi tluklehdingawn 1.4 awmnaah Covid-19 kai hi 80,000 an la tling lo deuh a, hetih lai hian ram dang, mi tluklehdingawn 6.3 zingah he hri kai hi mi 2,790 an awm tawh.
Middle East-a he hri kai 200-te zingah hian Iran mi an tam ber a, mi 139-in an kai a ni. United Arab Emirates (UAE) chu Middle East ram zinga a kai hriatchhuah hmasakna ber a ni bawk. Covid-19 hian khawvel insumdawn tawnnaah nghawng neiin, economy pawh a nghawng chho mek bawk a ni.
World Health Organisation (WHO) chuan Covid-19 hi ram 47-ah a darh tawh tih a tarlang a, tunhnaia Italy, Iran leh South Korea-a a darh chak dan chu ngaihven ngai tak niin WHO director general Tedros Adhanom Ghebreyesus chuan a sawi. He hri kai hi khawvel pumah mi 82,165 an awm tawh a, heng zinga mi 78,598-te chu Mainland China, Hong Kong leh Macau-a mi an ni. Hetih lai hian China-ah chuan hri kai, enkawl dam an nih hnua damdawi-in aṭanga chhuahtir chu mi 32,495 an tling tawh bawk.