Japan-ah G20 summit nei

Group of 20 annual summit, ni hnih awh tur chu nimin khan Japan rama Osaka khawpuiah an nei ṭan. 

G20-ah hian khawvela developed leh developing country 19 leh European Union an tel. Group  member-te GDP hi khawvel puma GDP aṭanga 85% a tling pha a, khawvel mihring awm zat hmun thuma ṭhena hmun khat a huam a ni. G20-in a tum ber chu khawvel huapa sum dinhmun ngelnghet tak siam dan ngaihtuah a ni. 

G20 hian hruaitu nghet a nei lo a, kumtin December thlaah member ram aṭangin president dinhmun hi an inchelh chhawk ṭhin a; president hian a kum leha summit neih tur mawhphurhna a la ṭhin. G20 annual summit-ah hian member ni lo ram pawh sawm tel an ni ve thei bawk. Meeting hmasa ber hi kum 1999 khan Berlin-ah neih a ni. 

Kumin summit-a an agenda-ah hian, economy lian ram pahnih, China leh US inkara insumdawn tawnna kawngah inepna an neih mek chungchang telh niin; EU hruaitute chuan US-China trade war hian khawvel pum economy a nghawng buai theih thute an sawi. 

Nimin khan G20 hruaitute hian photo session neiin, hemi hnu hian 'Side Event on Digital Eco­no­my' tihah an tel zui nghal bawk.