US House-in Senate border aid bill a pass

United States House of Representatives chuan Ningani khan Senate-in dollar tluklehdingawn 4.6 emergency border aid bill a siam chu a pass pui ve ta. 

House Speaker Nancy Pelosi chuan a hmaa he bill a lo dodal tawhna chu thlakin, Democrats member dangte pawh bill thlawp zawnga vote thlak turin a ngen a ni. Pelosi chuan hei hi an beisei leh duhdan ang ni lo mah se, naupangte ṭanpuina rang zawka pek an nih theihna turin lungthlu vak lo chungin Senate bill chu an pawmpui ta tih a sawi. 

Democrats lam hian a hmain bill chungchangah hian sorkar official leh Senate hnenah khuahkhirhna khauh zawk siam a, Trump kaihhruai sorkarin sum a hman danah leh pem luhte humhimna pek an nih dan turahte khuahkhirhna siam an lo phut tawh a ni. 

Senate chuan Nilaini khan emergency border aid bill hi a pass a, Ningani khan House-ah ngaihtuah a ni ve leh a ni. House-a vote lakah hian Senate bill thlawp lamah vote 305 tlain, a duh lo lamah vote 102 a tla thung. Pawm a nih tak avangin President Donald Trump pawmpuina leh signature la turin thawn nghal a ni. 

Senate bill-ah hian ramri-a US sipaite hnathawhna atana dollar maktaduai 145 dah a ni a, border station-a pem lutte khawsakna leh hrenna hmun tihchangtlunna turin dollar mtd. 793 leh enkawlna tur dollar mtd. 112 dah a ni. Pemlut zinga naupang, enkawl­tu neitute buaipuitu Health and Human Services Department (HHS) atan dollar tld. 2.88 ruahman a ni bawk.'