Hamas leh Israel-ten inremna thar ziak leh

Gaza Strip-a rorellai, Palestinian pawl Hamas leh Israel chuan nimin khan ramri-a nawrh huaihawtna thleng ṭhin thununna tur leh, Gaza aṭanga balloon hal chunga chhuah ṭhin tihtawpna turin inremna thar an ziak leh nia sawi a ni. 

Army Radio chuan Israel leh Hamas-ten inremna an ziah thu hi a sawi a, he inremna an ziah avang hian Israel chuan Gaza-a fishing zone chu tuipui mel 15-in a tihzauh sak dawn a, Gaza sangha mantute lawng a man sak 60 pawh a chhuahsak nghal dawn tih a sawi. Israel hian Gaza Strip-a diesel supply pawh a pek chhunzawm dawn bawk. 

Gaza aṭang hian balloon alh chu Israel lamah hian chhuah a ni ṭhin a, hei vang hian ramri bulah ni 18 chhung chu kangmei a chhuak fo a ni. Jewish National Fund chuan hmun 1,124-ah kangmei hi chhuakin, ram acre 2,700 vel zeta zau a kangchhe tawh tih a sawi. 

Tunkar chhung pawhin balloon alh chhuah vang hian hmun 100 chuang zetah kangmei a chhuak a, heng zinga a tam zawk hi Ashkelon Beach, Eshkol leh Sha'ar Hanegev biala thleng a ni. Kangmei chhuak ṭhelh tur hian sipaite pawh koh luh an ni.