US-a inkahna thlengah mi paruk thi

US-a Milwaukee khuaa Molson Coors brewery hmunah Nilaini khan kum 51 miin silai hmangin mi a pawng kah a, he thil tlengah hian mi paruk an thi.

Thite hi zu siamna, Molson Coors brewery hmuna hnathawk mi panga an ni a, silai kaptu hi a hnuah amah a inkap hlum nghal bawk a ni. 

Police-te chuan he thil thlengah hian thite bak lo chu hliam tuar dang an awm lo niin an sawi a,  engvanga pawikhawihna hi thleng nge tih leh chanchin kimchang chu an chhui chian mek thu an tarlang bawk. 

President Donald Trump chuan thi chhungte chu a tawrhpui tak zet thu sawiin, he thil thleng hi a dem tak zet thu a sawi bawk. Molson Coors brewery CEO Gavin Hattersley chuan an hnathawkte thi an awm hi pawi a tih thu leh na a tih ngawih ngawih thu a sawi a, he thil thleng vang hian tunkar chhung chu an dawr hi khar rih a nih dawn thu a sawi.

Nilainia inkahna thleng chhiar tel loin, kumin chhungin US-ah hian inkahna hi ṭum thum a thleng tawh a, heng thil thlengah hian mi 12 an thi tawh a ni. Nikum chhung khan US-ah hian inkahna vawi 44 a thleng a, mi 224 an thi a ni.