US-Taliban peace deal ziahnaah Pakistan sawm

Qatar sorkar chuan an ram khawpui, Doha-a United States leh Afghanistan-a Taliban firfiak pawlten inremna an ziahna tura Pakistan chu tel ve turin a sawm. 

Pakistan-a Qatar ambassador, Saqr bin Mubarak chuan Qatar foreign minister aiawhin Pakistan foreign minister Shah Mahmood Qureshi a sawm a ni. 

Qureshi chuan US-Taliban peace deal siam a ni thei tur chu lawmawm a tih thu sawiin, Afghanistan buaina chu sipai chakna hmang ni lo, inbiakna hmanga chinfel theih ringtu an nih reng thu a sawi. Pakistan leh Qatar chu Aghanistan-a inremna a awm theihna hma la tu pawimawh tak an ni, a ti bawk.

 

Kum 18 chuang zet Afghan war thleng tawh tihtawp a nih theihna turin US-Taliban peace deal hi naktuk hian Doha-ah ziah an tum. Hun rei tak tualchhung indona thleng vang hian civil mi sing telin nunna an chan tawh  bakah, Afghanistan ram chu ram rethei tak a nih phah reng a ni. Indona avang hian Afghanistan mi maktaduai 2.5 vel chu ram hrang hrangah an tlanchhe tawh a ni. 

US leh Taliban-ten inremna an ziahfel chuan, Afghanistan-a US sipai la awmte chu lakchhuah an nih rin a ni. Military official-te chuan US sipai la awm zat chiah hi sawilang lo mah se, America sipai hi 14,000 vel an la awm nia sawi a ni.