UN-in Myanmar sipaite chet dan demna chhhuah US-in sipai hotu fa pahnih hrekna a siam
United Nations Security Council chuan Myanmar sipai rorelna duh lohna lantira nawrh huaihawtte laka sipaite chet dan demna thuchhuah siamin, sipaite chu nawrh huaihawtte lakah insum turin a ti. Hetih lai hian US chuan sipaite hotu lu, general Min Aung Hlaing-a fa pahnihte hrekna a siam thar ve leh bawk.
UNSC chuan hun eng emaw chen Myanmar tualchhung dinhmun an sawiho hnuah, Nilaini khan sipaite chetdan an demna thuchhuah hi an tichhuak ta a ni. UNSC member 15-te chuan boruak muanawm tak hnuaia nawrh huaihawt; hmeichhia, ṭhalai leh naupangte chungah tharum hman a ni ṭhin chu an dem tak zet tih an sawi. "Council chuan sipaite chu inbengdai turin a ngen a, thil awmdan hi ngunthluk takin a lo thlir zui zel dawn a ni,"an ti.
UN secretary general Antonio Guterres chuan he thuchhuah siam hian Myanmar sipaiten an man mekte chhuah zalen leh, nikum November thlaa inthlanpui an neih result chu an zah a, an pawm ngei a pawimawh tih a hriatchhuah tir ngei a beisei thu a sawi.
US in hrekna siam belh zel
US chuan Myanmar sipaite chet dan duh lohna lantir hian sipai official ṭhenkhat leh, sipai nena inzawmna nei pawl ṭhenkhat a lo hrek tawh a, Nilaini khan sipai hotu lu ber general Min Aung Hlaing-a fate pahnih a hrek leh bawk.
US secretary of state Antony Blinken chuan thuchhuah siamin, sipai chakna hmanga civil sorkar thuneihna hnehchhuh a nih avang leh, he thil duh lohna lantira nawrh huaihawtte chunga sipaite chet dan avangin US chuan Aung Paye Sone leh Khin Thir Thet Mon bakah an company enkawl parukte chu an hrek belh tih a sawi.
Blinken chuan a ṭul a nih chuan mipuite rapbet a, tharum thawhna thlenga inhnamhnawihte laka action lak belh zel an hreh dawn lo tih sawiin, hrekna hi Myanmar mipuite an thlawpna lantirna atan, civil sorkar paithlakna anihnaa inhnamhnawiha lakah siam a ni tih a sawi bawk.
Nawrh huaihawt zinga 8 thih belh
Nimin khan sipai rorelna duh lohna lantira nawrh huaihawt zinga pariat chu security force-te silai hmehpuahah an thi leh nia sawi a ni.
Security force-ten Myaing khuaa nawrh huaihawtte lam hawia silai an hmehpuahah mi paruk an thi a, Yangon-a North Dagon district-a nawrh huaihawt zinga pakhat leh Mandalay-ah mi dang pakhat an thi bawk.
Sipaite chet dan hi ram leh pawl hrang hrangten an demna thu an sawi nasa tawh hle a, hetih lai hian brigadier general Zaw Min Tun chuan nimina news conference a neihah, sipaite chu an inthunun ṭhat thu leh, tharum pawh a ṭul tawpah lo chuan an hman loh thu a sawi thung. Sipaite chuan inthlanpui buatsaih a nih leh hma, hun rei vak lo chauh thuneihna hi an chelh dawn tih sawiin, democracy ram dik tak din turin kawng an zawh mek niin a sawi.
Inthlan hi kum khat chhunga buatsaih an lo tiam tawh a, mahse a ni tur erawh an la sawilang lo.