Brazil-ah Covid-19 vangin ni khatah mi 2,000 chuang thi

Brazil ramah Nilaini khan Covid-19 hri vangin mi 2,286 an thih belh leh a, he hri thihpui hi mi 2,68,370 an awm tling tawh. US dawtah Brazil hi Covid-19 hri thihpui tam ber a ni. 

Brazil ramah hian hri leng hi a la hluar hle a, expert-te chuan Covid-19 hri chi thar a awm belh zel avangin a la darh belh zel niin an sawi. Hri lengin ziaawm lam a la pan theih loh avangin khawpui lian hrang hranga health system dinhmun pawh a ṭha lo hle. State capital 15-ah chuan intensive care unit (ICU) chu 90% chuang an luah reng nia sawi a ni. Public health centre Fiocruz-a researcher Margareth Dalcolmo chuan kum 2021 chu an ram tan hun harsa tak a la ni chhunzawm zel dawn tih a sawi. 

Hripui hi mi 1,00,000 zinga 128 zelin an thihpui anga chhut a ni a, khawvela thihpui rate sanna ram 11-na a ni pha. Hri thihpui rate sanna ber chu Czech Republic niin, mi 1,00,000 zinga 208 zel chu Covid-19 vang hian an thi niin Johns Hopkins University chuan a chhut a, UK-ah chuan mi 1,00,000 zinga 188 chu he hri vang hian an thi a ni. 

Nimin khan World Health Organization-in Covid-19 hri leng chu khawvel huapa hripui leng, pandemic-a puan champha a ni. Nimin thleng khan khawvel pumah hri kai hmuh chhuah tawh hi mi maktaduai 118 chuang an awm tawh a, an zinga maktaduai 2.6 chuangin an thihpui tawh a ni. 

Nilaini khan Brazil-ah hian hripui kai hmuh chhuah thar mi 79,876 an awm a, hri kai an pun zual lehna chhan hi Manaus khuaa Covid-19 hri thar, P1 tih hmuh chhuah thar a nih leh vang nia sawi a ni.