Thamna sum leh rangkachak dawngah Suu Kyi puh

Myanmar sipai sorkar chuan hruaitu paihthlak tak, Aung San Suu Kyi chu thuneihna an chan laia dan loa US dollar nuai ruk leh rangkachak dawngah a puh. 

Sipai sorkar thupuangtu, brigadier general Zaw Min Tun chuan President Win Myint leh cabinet minister-te chu eiruah a puh bawk. President chuan nikum November thlaa inthlanpui an neih a felfai tawk lo nia sipaiten report an thehluh chungchangah hma lak sak loturin election commission a nawr niin a puh a ni. 

Nimina sipaiten thamna sum ṭhahnem tham tak leh rangkachak dawnga Suu Kyi an puh chungchangah hian finfiahna engmah an tarlang tel lo. Mahse Yangon chief minister hlui Phyo Mein Thein-a'n complaint a thehluh aṭangin heng thamna te hi a dawng ngei a ni, tiin hemi chungchang hi anti-corruption committee in a chhui zui mek thu Zaw Min Tun chuan a sawi.