Japanese Emperor Akihito-a'n Thuchah hnuhnung a sawi

Japan Emperor Akhito chuan nimin khan Tokyo-a Imperial Palace-ah lal a nih anga a thuchah hnu­hnung ber chu vantlang hmaah a sawi. 

Akhito hi kum 200 chuang chhunga lal nihna bansan hmasa ber a ni a, hei vang hian ngaihven a hlawh hle. Kum 85 mi ni tawhin a kum upat tawh avang leh a hriselna a ṭhat tawh loh avangin lal a nihna hi a bansan a ni.

Vawiin hian a fapa, Crown Prince Naruhito chuan lal nihna dinhmun hi a luah dawn nia tarlan a ni. Japan lal hian political power an nei lo a, mahse ram hruaitu anga ngaih an ni thung.

Lal a nih anga thuchah hnu­hnung a sawinna-ah hian Akhito chuan Japan leh khawvelah remna leh muanna a awm zel a duh thu a sawi. Amah thlawptu mipuite chungah lawmthu sawiin, amah thlaktu tur hnuaiah pawh inrem taka an awm chhunzawm zel a beisei thu a sawi. An ram leh khawvel mipuite hlim takin awm se tih chu a ṭawngṭaina a nih thu a sawi bawk.

Akhito thusawi ngaithla tur hian Imperial Palace kawtah, ruahsur hnuaiah mi tam tak an pungkhawm a, lal a nihna a bansanna ceremony erawh hi chu Imperial Palace chhunga Matsu-no-Ma state room-ah neih a ni thung. He hunah hian Prime Minister Shinzo Abe, Crown Prince Naruhito leh Crown Princess Masako-te pawh an tel a ni.