Mount Everest-ah bawlhhlawh kg 3,000 chuang chhar khawm

Nepal sorkar hmalaknain April 14 aṭang khan Mount Everest leh a chhehvel thenfai beihpui 'Sagarmath Cleaning Campaign' neih a ni a, bawlhhlawh kg 3,000 chuang zet chharkhawm a ni tawh. 

Department of Tourism-a Director General Dandu Raj Ghimire chuan tlang leh a chhehvela bawlhhlawh an chharkhawmte chu Nepali Army helicopter hmangin Okhaldhunga-ah kg 2,000 leh Kathmandu-ah kg 1,000 thawn a ni tih a sawi. 

Ghimire chuan, "Kan team-te hian cleaning campaign nei tur hian Eve­rest base camp an thleng tawh a, an mamawh tur hrang hrang - ei tur, tui thianghlim leh an awmna turte pawh ruahman fel vek a ni," a ti. Department chuan faina campaign kalpuina atan Nepalese rupees maktaduai 23 vel ruahman a nih thu a sawi bawk. 

"He campaign-na hnuaiah hian Base Camp area aṭangin bawlhhlawh kg 5,000, South Col region aṭangin kg 2,00 leh Camp II leh III area aṭangin kg 3,000 vel kan lakhawm dawn a ni," tiin Ghimire chuan a sawi. Khawvela tlang sang ber Mount Everest thenfai hna thawk tur hian - Ministry of Culture, Tourism and Civil Aviation, Ministry of Environment, Nepali Army, Nepal Mountaineering Association, Sagarmatha Pollution Control Committee, Khumbu Pasang Lhamu Rural Municipality leh Nepal Tourism Board te an thawkho a, hei hi a huhoa hma an lakhona hmasa ber a ni nghal bawk.