Japan-in lal thar a nei ta

Kum 59 mi, Nahurito chuan nimin aṭang khan Chrysan­themum Throne luahin Japan lal thar a ni ta. 

Emperor Nahurito-a pa, kum 85 mi Emperor Akihito chu lal a nihna aṭanga bangin, a ban tukah a thlaktu atan a fapa hi lal-ah siam a ni zui ta a ni. Emperor Naruhito hi Japan ram lal 126-na a ni. Akihito chuan Thawhlehni khan lal a nihna anga a thusawi hnuhnung ber sawiin, lalna a bansan thu hi a puang a, mipuite hnenah lawmthu sawiin amah thlaktu hnuaiah pawh inrem taka an awm chhunzawm zel a beisei thu a sawi.

Japan leh khawvelah boruak muanawm leh hlimna a awm zel a duh thu a sawi bawk. Akihito hi Japan ramah kum 200 chuang chhunga lal ṭhutthleng, Chrysanthemum Throne a luah lai bansan hmasa ber a ni. Akihito hi Emperor Emeritus tia sawi a ni tawh ang. 

Japan lal thar, Emperor Nahurito lalna hnuaiah lal hunbi thar, 'Reiwa' era a inṭan nghal a ni. Japan hian lal thar an neih apiangin an lal hunbi hming thar hi an puang zel ṭhin. "Reiwa' era hming tur pawh hi April 1 khan lo puan lawk a ni tawh a, hei hi mipui vantlang leh company-ten an lal hunbi hming thlak danglam chungchanga an lo inbuatsaih theihna atana tih a ni. 

Emperor Naruhito hi kum 1960, February 23-a piang a ni a, Japan lal ni tawh zingah Indopui II hnua piang awmchhun a la ni. Kum 1982 khan Gakushuin University aṭangin History-ah Bachelor of Letters degree a zo a, hemi hnu hian UK-a Merton College, Oxford University-ah zir zawmin kum 1986 thleng a awm a ni. Japan rama a kir leh hnuah Gakushuin University aṭangin History-ah Master of Humanities degree a zo leh bawk. 

Kum 1993 January 19 khan Masako Owada nen inhualin, June 9-ah Tokyo-a Imperial Shinto Hall-ah an innei. An inneihnaah hian Europe ram hruaitu eng emaw zat an tel a, khawvel hmun hrang hrang aṭangin mi maktaduai 500 velin TV aṭangin an thlir bawk a ni. Kum 2001, December 1 khan fanu Aiko, Princess Toshi tih chu an nei a ni. Mahse Japan ram danah hmeichhiain lal ṭhuthleng an luah theih loh avangin a fanu hian a thlak thei dawn lo a ni.