Trump-a'n firfiak pawlah Muslim Brotherhood puan tum

US President Donald Trump-a kaihhruai sorkar chuan Egypt-a Islamist movement upa ber, Muslim Brotherhood chu 'foreign terrorist' organisation-ah puan tumin hma a la mek. 

White House press secretary Sarah Sanders-i chuan president hian hemi atan hian national security team leh region leader-te a berawn mek tih a sawi. Egypt President Abdel Fattah el-Sisi chuan Apri 9-a White House-a President Trump-a nena an inkawm ṭum khan Muslim Brotherhood hrekna tura hma la turin a lo nawr tawh a ni. Meeting an neih zawh hian Trump chuan Sisi chu president ropui tak tiin an fak zui a ni.  

Muslim Brotherhood, Ikhwan al-Muslimeen tih bawk chuan US thiltih tum dan chu an hnawl thu sawiin, "Eng thutlukna pawh siam se, Muslim Brotherhood chu pathian khawngaihna leh thiltihtheihna hmangin a chak zual zel dawn a ni", tin an website-ah an tarlang. 

Kum 1928-a din, Muslim Brotherhood hi khawvela Islamic movement chak leh upa ber zinga mi niin, kum 2012 inthlanah khan Egypt-ah thuneihna an chang a ni. Mahse el-Sisi-a kaihhruaia sipaiten Brotherhood member leh democracy hmanga president atana thlan tlin hmasa ber, Mohamed Morsi an paihthlak hnuah he pawl hi firfiak pawlah puan zui a ni.