Jaish-e-Mohammed hruaitu Masood Azhar United Nations-in terrorist-ah puang

Pakistan firfiak pawl Jaish-e-Mohammed (JeM) hruaitu Masood Azhar chu United Nations chuan terrorist-ah a puang. 

JeM hian February thla khan India ramchhunga Kashmir-ah bomb tipuakin sipai 40-in an thih phah a ni. UN hian Masood Azhar hi terrorist-a puan a lo tum fo tawh a, mahse China chuan a veto power hmangin a lo dang 

ṭhin a ni. China chuan tun ṭumah hian Masood Azhar tan hian ban a phar tawh lo a, terrorist-ah puan a ni ta a ni. 

Masood Azhar hi a thil neihte hren sak nghal a ni dawn a, zin chhuah khapsak a ni bawk ang. UN-a India ambssador Syed Akbaruddin chuan UN-in Masood-a terrorist-a a puang chu lawmawm a tih thu sawiin, thlawpna an hmuh avanga a lawmthu a sawi.

Pakistan foreign office thu­puangtu Mohammad Faisal chuan India tana hnehna 'ni' anga sawi chu thildik a nih loh thu a sawi thung a, mahse Pakistan chuan UN thuchhuah chu an kapui nghal dawn tih a sawi nghal a ni. JeM hotupa terrorist list-a telh tur hian US, Britain leh France chuan Kashmir beih a nih hnu khan rawtna an thlen a, Pakistan ram ṭhianṭha China chuan a hmaa Masood chungchanga rawtna thlen ṭhin chu hnawl ṭhin mah se Nilaini khan terrorist-a puanna chu a pawmpui ta a ni. China hian 2016 leh 2017 khan Masood Azhar terrorist-a puanna tur hi a lo hnawl tawh thung.

Masood Azhar hian 1999-a India-in a chhuah zalen aṭang khan JeM hi a din nia sawi a ni a, India chuan 2001-a Delhi-a parliament beihna pawh kha JeM tih a nih thu an sawi. Khami hnu lawk khan Pakistan chuan JeM hi an ram aṭangin a hnawl a, mahse Afzal Guru Squad, Al-Murabitoon leh Tehreek-al-Furqan tih hmingpute in an la kal reng tho a ni.