Ex-CIA agent-in China spy a ni tih inpuang
US-a Central Intelligence Agency (CIA) agent hlui, Jerry Chun Shing Lee chuan China Spy a ni ṭhin tih a inpuang niin, US justice department chuan an sawi.
Jerry Chun Shing Lee (54) hian 2007 khan CIA hi a chhuahsan a, hemi hnu hian Hong Kong-ah insawnin Chinese agents-a zawm zui a ni. Prosecutor-te chuan Jerry Chun Lee hi US thuruk hrilh ṭhin turin China hian pawisa a pe ṭhin niin an sawi a, hei vang hian 2010 leh 2012 khan China chuan US thuruk an hriat theih phah niin an tarlang.
Khatih hunlai khan thuruk sawichhuaktu mi 20-te chu thah emaw jail-ah emaw dah an ni a, tun hnaia US intelligence hlawhchhamna lian ber zinga mi nia ngaih a ni bawk. US Assistant Attorney General for National Security, John Demers chuan Lee-a case chu US agent, China nena inkungkaihna nei case kum khat pawh tling loa an buaipui pathumna a nih tawh thu a sawi.
Lee hian CIA activity, US agent-te awmna nen lam a hrilh ṭhin nia sawi a awm bawk a, 2012 khan FBI agent-te chuan Hawaii-a Lee-a thlenna hotel an dapna-ah USB- US document pawimawh a dah ṭhinna te pawh an hmuchhuak a ni.
2012 khan Central Intelligence Agency officer-in a interview-naah Chinese intelligence officer nen an inhmu tih chu a sawi tawh a, mahse hemi ṭum hian China lam hian hna an tuk tih erawh a sawi lo thung. January 2018 khan rinhleh vangin man ni mah se Nilaini khan China spy a nih thu hi a inpuang chauh a ni.