Paris: May Day rally-ah buaina chhuak
Tihphunga an neih ṭhin angin May 1 khan France khawpui Paris-ah chuan May Day rally neih a ni a, buaina nasa tak chhuak zuiin - mi 38 in hliam an tawrh bakah mi 380 vel man an ni bawk.
May Day rally-ah hian "yellow-vest" movement leh "black blocks" intite leh police-te inkarah buaina a chhuak a, dawr eng emaw zat tihchhiat a ni. Buaina chhuahnaah hian police 7,000 vel tirh nghal an ni a, mipui hnawh darh nan tear gas leh water cannon-te pawh hman a ni.
Hliam tuar zingah hian police officer 14 an tel nia tarlan niin, black blocks inti te hi kawngzawh ho hmaah hian kalin anti-riot police-te chu lung leh bottle hmangin an vawm a ni. Mi ṭhenkhat chuan lirthei an hal bakah bungrua-te an tichhia a, buaina chhuahna hmunah hian police-te chu tirh nghal an ni.
Hmun ṭhenkhatah chuan mipuite hian police station luhkung an tum nia sawi a awm bawk. France interior ministry chuan ramchhung hmun hrang hrangah mi 1,50,000 velin kawng an zawh tih sawiin, Paris bikah hi chuan 16,000 vel an nih thu an sawi a, kum liamta aiin an tam zawk tih a sawi bawk. Media ṭhenkhat chuan Paris-a kawngzawh hi 40,000 aiin an tam niin an sawi thung.