Kim Jong Nam thah thubuai aṭangin Doan Thi Huong chhuah zalen

North Korea hruaitu lu Kim Jong-Un-a unaupa Kim Jong Nam thahnaa inhnamhnawiha puh vanga Malaysia jail-a kum hnih zet tan tir a nih hnuah, Vietnam mi Doan Thi Huong (30) chu a thubuai hlihsak niin, chhuah zalen a ni. 

Kim Jong Nam hi February, 2017 khan Ma­laysia-a Kuala Lumpur airport-ah liquid VX tur hmanga hraihlum a ni a, tur hi a hmaia tah nia sawi a ni. He tualthahnaah hian Doan Thi Huong-i hi inhnamhnawiha puh a ni a, amah bakah hian Indonesian hmeichhe pakhat chu inhnam­hnawiha puh a ni bawk.

Doan Thi Huong-i hian vawi tam tak fiahna a hmachhawn hnuah thla hmasa khan tualthata puh a nihna hi ngaihtuah ṭha turin a ngen a, hemi hnu hian Malaysian prosecutor-te chuan tualthata puhna thubuai hi an hlihsak ta a ni.

Nimin zing khan a jail tanna aṭang hian chhuah zalen a ni a, a lawyer Hisyam Teh Poh Teik chuan Vietnam pan nghal a tum tih a sawi.