New Zealand : Mosque beihnaa hliam zinga mi thi leh

March thlaa New Zealand-a Christchurch khuaa Mosque beihnaa hliam tuar zinga mi, Turkish mi pakhat chu nimin khan a thi ve leh. Heti hian Christ­church-a Mosque beihnaa thi hi mi 51 an tling tawh a ni. 

Mitthi hi he thu ziah lai hian a hming tarlan a ni lo a, kum 46 mi a nih thu erawh tarlan a ni thung. Kar sarih liamtaa Christchurch-a Al Noor Mosque beih a nih ṭum khan silaia kah hliam niin, Christchurch Hospital ICU-ah enkawl zui a ni a, zirtawpni khan a hliam tuar loin a thi ta a ni.

New Zealand Prime Minister Jacinda Ardern chuan Turkish mi hi a ṭhat chhuah leh beisei hle mah se a hliam tuar loin a thi ta tih a sawi a, ram pahnihte inkarah nghawng ṭha lo nei lo se a duh thu a sawi. Australia mi, kum 28-a upa Brenton Tarrant chuan March 15 khan New Zealand-a Chirstchurch khuaa Mosque pahnih chu silai nen luhkhungin ṭawngṭai tura kalte chu a pawngkah a ni. Tarrant hian Mosque a bei lai hi Facebook-ah a live a, Facebook chuan video hi paih nghal vat mah se a darh hman tho a ni. 

Brenton Tarrant hi mi thah thubuai leh midang thah tum thubuai eng emaw zat awrh tir mek a ni. Chirstchurch khuaa Mosque beih a nih hnu hian New Zealand leh Turkey inkar boruak hi a ṭha lo chho hle nia sawi a awm a, Turkish President Recep Tayyip Erdogan pawhin Mosque beihna hi Islam-te huatna a nih thu a sawi tawh bawk.