Thamna laa puhna Suu Kyi-i Lawyer-in a pha

Myanmar-a sipai sorkar thupuangtu, brigadier general Zaw Min Tun-a'n hruaitu an paihthlak tak, Aung San Suu Kyi-i'n thuneihna an chan laiin thamna, US dollar 6,00,000 leh rangkachakte a dawng nia a puhna chu thil nuihzatthlak tak a nih thu, Suu Kyi-i lawyer Khin Maung Zaw chuan a sawi. 

Kum 75 mi, Suu Kyi hi February 1-a sipaiten civil sorkar thuneihna an hnehchhuh hnu khan man zui nghal niin, tun thlengin an la hreng a ni. Man a nih hnuah thubuai pali siamsak a ni tawh a, heng zingah hian dan kalha ram pawn aṭanga walkie talkie radia paruk lalut leh, coronavirus restriction palzutah puhnate a tel. Thamna laa puhna, eiruk thubuai hi siam belh sak leh a nih chuan a hremna pawh a nat hle rin a ni bawk. 

Suu Kyi-i lawyer, Khin Maung Zaw chuan sipaiten thamna laa an puh chungchang hi Ningani vek khan social media lamah chhangin, "He puhna hi thil nuihzatthlak tak a ni. Suu Kyi chuan chak lohnate pawh a nei ve ngei a, mahse moral principle lamah chuan chak lohna a nei ve lo," a ti. 

UN special rapporteur for Myanmar chuan sipai rorelna duh loha nawrh huaihawt zinga mi 70 vel chu sipaite kut tuarin an thi tawh niin a sawi. In thahna leh inghaisakna a hluar chho zel tih a sawi bawk. 

Human rights investigator Thomas Andrews chuan thi zinga a zahve aia tam hi kum 25 hnuai lam an ni tih sawiin, mi 2,000 man an ni tawh bawk a, an zingah hian zirlai tam tak an awm tih  UN Human Rights Council a hrilh.  Sipaiten nawrh huaihawtte kut an thlak lai te, mi thil neih an tihchhiat sak lai te, chenna in lam hawia silai an pawng kah laite leh mi an man lai video-te pawh hmuh tur tam tak a awm a ni, a ti. Sipai hruaitute leh sum an lakluhnate hrek a ngai tih sawiin, sipaite kuta sumdawnna awmte leh oil and gas enterprise-te chu hrek beh a ngai a ni, tiin a sawi.