US-in Burmese-te 'protected status' pe
US sorkar chuan kar liam ta Zirtawpni khan thuchhuah siamin, an rama Burmese awm te chu 'temporary protected status' pek an nih thu a tarlang. Hei hian thla 18 chhung a huam ang.
"Sipai sorkarna leh rorelna avangin, mipuite chungah hleilenna a thleng mek a ni. Myanmar rama chengte chuan harsatna nasa tak an tawk mek a, hei vang hian an him nan tiin sorkar chuan US-a awm mekte chu protected status a pe a ni," tiin US Department of Homeland Security Secretary Alejandro Mayorkas chuan a sawi.
Kumin February 1 aṭang khan Myanmar ram hi sipai chakna hmanga civil sorkar paihthlak a nih hnuah sipai rorelna hnuaiah a awm a ni. An ram mipuite chuan sipai sorkar hi duh loin nawrh an la huaihawt chhunzawm reng bawk.
CRPH-in sipai rorelna dodal zel tum
Sipaiten civil sorkar an paihthlak hnu leh, state Counsellor Aung San Suu Kyi leh president Win Myint te an man hnuah pawh roreltu paihthlakten an din, Committee for Representing Pyidaungsu Hluttaw (CRPH) chuan civil sorkar a din theihna turin sipai rorelna chu an dodal zel dawn tih an sawi.
Kar liam ta khan CRPH hi din a ni a, Mahn Win Khaing Than chu acting vice president atan ruat a ni. CRPH hian an ram sipaite chu firfiak pawlah an puang nghal a ni. Mahn Win Khaing Than hian kar liam ta Inrinni khan Facebook kaltlangin mipuite hnena thuchah a tichhuak a, an ramin hun thim ber a tawng mek tih a sawi a, mahse khawvar hun a hnai tawh hle a ni, a ti.
Mi 12 thih belh
Inrinni liam ta khan kum 1988-a Rangoon Institute of Technology campus chhunga sipaiten Phone Maw an thah champha hman a ni a, he hunah hian sipaite chuan mi an kaphlum leh a, hei bakah hian Mandalay-ah mi panga kaphlum lehin, an vaiin kar liam ta Inrinni khan sipaite kut tuarin mi 12 an thih belh leh a ni.
Kar liam ta Inrinni thleng khan sipai sorkar duh lohna avanga buaina chhuakah hian mi 80 chuang an thi tawh a, sipaite chuan mi 2,100 chuang an man tawh bawk tih Assistance Association for Political Prisoners advocacy group chuan a tarlang.