Thailand lal thar hnenah Lallukhum khumtir

Thailand lal thar, King Maha Vajiralongkorn chu Inrinni khan lallukhum, Great Crown of Victory chu khumtir a ni ta. Lal thar lawmna hi vawiin thleng hian neih zui a ni ang. 

Nimin khan an ram khawpui, Bangkok-ah lal thar lawmna parade neih a ni a, Grand Palace aṭanga royal temple inkar kawng km 7-a thuiah kawngzawh ropui tak neihpui a ni. Kum 2016 khan kum 70 chhung zet Thailand lal lo ni tawh, Bhumibol Adulyadej chu a thih avangin amah thlaktu turin a fapa hi ruat a ni a, Bhumibol Adulyadej sunna hun hi rampumah hun rei tak hman a nih avangin, a sunna hun hman zawh a nih hnuah lallukhum hi khumtir a ni ta chauh a ni. Vajilongkorn hi King Rama X tih a ni dawn a, Chakra dynasty-a lal 10-na a ni. 

Kum 66 mi, King Vajiralongkorn hian lallukhum khumtir a ni hma lawk hian a personal guard deputy head, General Suthida Tidjai chu nupuiah a nei a, Queen nihna a pe zui bawk. Suthida Tidjai hi Thai Airways-ah  flight attendant a ni ṭhin a, kum 2014 khan Vajiralongkorn hian a bodyguard unit-a deputy commander turin a ruat a ni. Foreign media-te chuan king leh Suthida hi an inkawp niin an sawi ṭhin a, mahse lal chhungkaw lam chuan an pahnih chungchang hi an sawilang ngai lo thung. 

King Vajiralongkorn hian a hmain nupui pathum a lo nei tawh a, kum 2014 khan fapa a nei bawk. Lal thar lawmna kawngzawh neih a nih dawn avang hian Bangkok khawpuia kawtthler 33 zet chu khar a ni. Lal thar lawmna atana sum senso hi an ram pawisa 'baht' tluklehdingawn 1 (dollar makaduai 31) vel zet a tling dawn nia sawi a ni. Vawiin hian lal thar lawmna ni tawp ber hman a ni dawn a, Grand Palace-a balcony aṭangin a inlan leh ang. Hemi hnu hian international diplomats-te a hmu leh dawn a ni.