Russia thlawhtheihna kangah mi 41 an thi

Khualzin phur Russia thlawhtheihna chu Moscow-a Sheremetyevo airport-ah emer­gency-a ṭum tir a nih hnu­ah nasa taka kangin mi 41 an thi. 

Aeroflot aircraft-ah hian khualzin 78 leh thawktu panga an chuang a, thi zingah hian naupang pahnih leh flight attendant an tel. Mi parukin hliam an tuar bawk a, hengte hi damdawi-inah dah hluh nghal an ni a, an zinga pathum chu an dinhmun a ṭha lo hle. 

Russia ministry of health hotu Veronika Skvortosova chuan thlawhtheihna hi a thlawh chhuah hnuah a khawl lama harsatna a awm avangin airport lamah a kir leh nghal tih a sawi a, a chhan dang erawh a sawibelh lo. Shukhoi Superjet-100 hi an ram huna Pathianni zan dar 6.02 khan Sheremetyevo airport aṭangin Murmansk panin a thlawk chhuak a, mahse a thlawh chhuah aṭanga reiloteah khawl lam fel lo a awm avangin distress signal a pe chhuak nghal a ni. Minute 40 vel Moscow region-a a thlawh kual hnuah Sheremetyevo aiport-ah ṭum tir a ni a, a ṭum hnuin runway-ah a kang zui ta a ni. Thawktute chuan khualzinte himna turin theihtawp an chhuah a, second 55 chhungin an hruaichhuak hman tih Aeroflot thuchhuah chuan a tarlang. 

Murmansk Acting Gover­nor Andrey Chibis chuan thlawh­theihna kanga thi chhungte chu zángnadawmna rubles maktaduai khat ṭheuh pek an nih tur thu leh, damdawi-ina enkawl hliam tuarte chu rubles 5,00,000 ṭheuh pek an nih tur thu a sawi.