Israel leh Gaza-in inkahhai puan remti

Palestinian official-te chuan Gaza Strip leh Israel chhim lama inbeihna thleng vanga Palestinian 23 leh Israel mi pali an thih hnuah, Israel nen inkahhai puang tura inremna an siam thu an sawi. 

Official-te chuan inkahhai puanna tura inremna hi Pathianni zan zanlai vel khan an siam a, hemi hnu hian Israel-in Palestinian ram chhungah beihpui a thlak chhunzawm tawh lo tih an sawi  bawk. He inremna siam tur hian Egypt leh Qatar chuan hma an lakpui tih an sawi bawk a ni. 

Hetihlai hian Israel lam chuan inremna siam chungchangah hian thuchhuah engmah a la nei lo thung. Rocket leh indo thlawhtheihna hmangin Gaza Strip leh Israel chhim lamte hi ni thum zet beih an ni hman a, nikum November thla hnu lama an inbeih nasat ber ṭum a ni. Kar kal ta kartawp lam khan Israel chhim lam bialah chuan siren tihrik chhunzawm reng a ni a, nimin khawvar hma khan siren hi tihtawp chauh a ni.