Sri Lanka-in Islam hruaitu 200 hnawt chhuak

Sri Lanka chuan Easter Sunday-a Kristiante biak-in leh luxury hotel hrang hranga pawikhawihna thleng kaihhnawihah ramdang mi 600 chuang a hnawtchhuak a, an zingah hian Islam sakhaw hruaitu 200 an tel. 

Easter Sunday-a thihchilh bomb ṭum eng emaw zat tih­puahah hian Sri Lanka chuan tualchhunga Islam firfiak pawl chu mawhphurtuah a puh a ni. Bomb puakah hian mi 257 an thi a, mi 500 dawnin hliam an tuar a ni. 

Home Affairs Minister Vajira Abeywardena chuan Islam hruaitu hnawhchhuahte hi dan ang taka an rama lut an ni a, mahse pawikhawihna thlen hnuah security force-ten ramdang mi awmte an dapchhuahnaah an visa-in a huam chin baka awm an ni tih hriatchhuah a nih thu a sawi. Pawisa chawi tir an nih bakah Sri Lanka aṭangin hnawhchhuah an ni zui a ni. 

Abeywardena chuan an ram dinhmun thlirin, visa system an hman mek chu ennawn a nih thu leh, sakhaw rawngbawltute tan pawh visa pek chungchangah khuahkhirhna khauh zawk siam an tum tih a sawi. Easter Sun­day-a firfiakte pawi­khawihna a thlen hnu hian ramchhunga school hrang hrangte khar a ni a, nimin aṭang khan grade 6 leh a chunglam chu an kal leh ṭan tawh. Mahse school compound-ah te venhimna khauh taka kalpui a ni a, naupangte chu school bag, lunch box leh water bottle-te chu langtlang vek hmang turin  hriattir an ni.