Myanmar jail aṭangin Reuters journalist pahnih chhuah

Reuters news agency journalist pahnih, Wa Lone leh Kyaw Soe Oo-te chu Official Secrets Acts bawhchhiaa puha ni 500 chuang jail-a khung an nih hnuah nimin khan chhuah an ni ta. 

Kum 33 mi Wa Lone leh kum 29 mi Kyaa Soe Oo-te hian Rakhine state-a Myanmar sipaiten Rohingya Muslim 10-te an thah chungchang an chhuinaah finfiahnate an lakhawm a, mahse an report tihchhuah a nih hmain sorkar lehkha pawimawh kawla puhin man an ni a, nikum September thla khan thiam loh chantirin kum sarih tang tura hrem an ni. Journalist pahnihte chuan sorkar document pawimawh an kawl nia an sawi hi restaurant-ah police pahnihten an pek a ni tih an sawi a, man an nih theihna atan an phiarru zawk niin an sawi. An thubuai ngaihtuahnaa thuhretua ding police pakhat pawhin restaurant-a meeting chu police thangkama journalist-te  awhtirna tura ruahmanna a nih thu a lo sawi tawh bawk. 

Man an nih hnuah an thawh­pui dangte chuan an report hi lo chhunzawmin nikum February thla khan tihchhuah a ni. He report vang hian Reuters chuan Pulitzer Prize for interna­tio­nal reporting a dawn phah a ni. Nimin zing khan Myan­mar President Win Myint office-in a tarlan danin tang 6,250 ngaihdam an nih thu a sawi. April 17 aṭanga inṭan, Myanmar New Year pualin Presi­dent hian thla hmasa khan a rualin ṭum hnih tang ṭhahnem tham tak a lo ngaidam tawh bawk a ni. Nimina tang ngaihdam zingah hian Reuters journalist pahnihte hi an tel a, nimin vek khan an tanna Yangon-a Insein tanin aṭangin chhuah nghal an ni. Nimina jail aṭanga chhuah an nih hnua chanchinthar lakhawmtuten an kawmnaah, WA Lone chuan journalist chu a ni chhunzawm zel dawn tih a sawi.