Sri Lanka: Pawikhawihnaa inhnamhnawihte man leh thah vek an ni tawh

Sri Lanka police hotu Chandana Wickramaratne chuan Easter Sunday-a an rama pawikhawihna eng emaw zat thlenga inhnamhnawiha rinhlelhte chu an vaiin man emaw thah emaw an ni vek tawh tih a sawi. Easter Sunday-a bomb eng emaw zat tihpuah vang hian mi 257 an thi a ni. 

Chandana Wickramaratne chuan thuchhuah siamin, April 21-a Sri Lanka-a biak in pathum leh luxury hotel-a bomb tihpuahnaa inhnamhnawiha rinhlelhte chu man emaw, thah emaw an ni vek tawh tih a sawi a, thah zingah bomb expert pahnih an tel tih a sawi bawk. Hei bakah hian pawikhawihna dang thlenna tura bomb an dahṭhatte pawh an man tel bawk a ni. 

President Maithripala Sirisena chuan an rama pawikhawihna thlen tum chungchang hriattir lawk an ni chunga an dan theih loh avangin an ram police hotu lu ber chu ban tirin, kar kal ta khan acting police chief atan Wickramaratne  hi a ruat a ni. President chuan boruak pawh a pangngai chho leh ṭan tawh tih sawiin, bomb tihpuah a nih hnua curfew puan pawh hlih a ni tawh bawk. Thawhṭanni khan kar hnih chhung zet school khar a nih hnuah hawn ṭan leh a ni a, mahse school kal erawh an la ṭha lo hle. 

Sri Lanka sorkar chuan bomb puak hi ramchhunga firfiak pawl, hriat la hlawh vak lo National Thowheed Jamath (NTJ)-te tih niin a puh a, mahse Islamic State (IS) firfiak pawl chuan an tih niin an chhal thung.