Myanmar-a nawrh huaihawtnaah mi 38 thih belh Yangon leh Mandalay-ah martial law puang

Myanmar sipai rorelna duh lohna lantira nawrh huaihawt zinga mi 38 chu Pathianni khan sipaite kut tuarin an thih belh leh nia sawi a ni. Yangon leh Man­dalay khawpui chhunga  hmun ṭhenkhatah sipai hnena thuneihna sang pekna, martial law puan a ni bawk. 

Assistance Association for Political Prisoners (AAPP) chuan February 1-a sipaiten civil sorkar an paihthlak avanga lungawi lohna lantira nawrh huaihawt zinga mi 126 chu thah an ni tawh tih a sawi a, kar liam ta Inrinni thlenga sipaiten an man chu mi 2,150 chuang an tling tawh bawk a ni, a ti. 

Pathianni khan Myanmar rama khawpui lian ber, Yangon-a Chinese factory pahnih chu mi ṭhenkhatin an hal a, pungkhawmte hi security force-te chuan silaiin an kap zui a ni. An zinga mi 22 chu kahhlum niin, mi 20 chuangin hliam an tuar bawk a, hliam tuar zinga pathum chu an dinhmun a ṭha lo hle. Eng pawl mahin factory haltu an nih thu hi an la chhal lo. Chinese factory beih a nih avang hian Hlaing Thar Yar leh Shwepyitha-ah martial law hi puan zui a ni. Heng bakah hian Mandalay khawpui hmun ṭhenkhatah martial law hi puan a ni bawk. 

Sipai enkawl, Myawaddy television chuan mipui pung­khawmten clothing factory pali leh fertiliser plant an hal hnuah security force-te hian an che ve chauh niin a sawi thung a, kang ṭhelh motor pawh mi 2,000 velin an lo dang bet tlat niin an puang. 

China Global Times chuan Myanmar rama Chinese-invested factory 32 te beih a ni tawh tih sawiin, thil tihchhiat hi US dollar maktaduai 37 hu a tling niin a sawi a, hnathawktu Chinese pahnihin hliam an tuar niin a tarlang bawk. Chinese embassy chuan Myanmar sipai hotute hnenah an rama tharum thawhna thleng mek titawp tura hma la turin a tia, an hmunte leh hnathawktute himna ngaihtuahsak turin a ti bawk. 

Mandalay leh khawpui dangah pawh nawrh huaihawtte leh sipaite inkarah buaina a chhuak bawk a, Bago khawpuia nawrh huaihawtte nena an intihbuainaah police offier pakhat a thi niin state television MRTV chuan a sawi. Buaina chhuah hnua police thi pahnihna a ni. 

Sipaiten an hren mek, civil hruaitu Aung San Suu Kyi chu nimin kha virtual hmanga court-a inlan tura tih a ni a, mahsei nternet service a awm loh avangin March 24-ah sawn a ni. 

Suu Kyi-i lawyer, Khin Maung Zaw chuan video conferencing a tih theih loh avangin hearing neih hun hi sawn hlat a nih thu a sawi. Sipaiten an man hnuah Suu Kyi hi thubuai hrang hrang siamsak a ni tawh a, a thubuaiahte hian thiam loh chantir a nih chuan hun rei tak jail tantir theih a nih dawn bakah, politics pawh khel thei tawh lo tura hremna pek theih a ni ang.