Sri Lanka-in burqa khap dawn

Sri Lanka sorkar chuan Muslim hmeichhiate hmai khuhna, burqa khapna dan siam a tum a, hei hian an rama sakhaw tlem zawk Muslim-ten an dodal nasat hle rin a ni. 

Minister Weerasekara chuan pawn chhuahnaa Muslim hmeichhiate hmai khuhna hman khapna siam rawtna hi ngaihtuah mek a ni tih sawiin, cabinet-ah rawtna pawh thlen a ni tawh a ni, a ti. Weerasekara chuan, "Sri Lanka tan chuan  burqa hi thil thar a ni. A hmain muslim hmeichhiaten pawn chhuahnaah an hmang ngai lo. Sakhaw tinte zalen taka an awmna ram kan ni reng a, tunhnaiah hmeichhe ṭhenkhatin burqa hi an hmang a, hei hian kan ram security dinhmun a tiderthawng thei niin kan ngai a ni," a ti. 

Buddhist Sinhalese chuan burqa hman hi Sri Lanka culture nena inmil lo nia sawiin, khap turin an lo nawr fo tawh a ni. Hetih lai hian Muslim pawlte chuan hei hi lo hnialin, an dikna chanvo a ni tiin sorkarin a khapsak ngawt thei lo tih an sawi ve thung. 

Mahse kum 2019 Easter Sunday-a pawikhawihna rapthlak tak a thlen hnuah khan sorkar chu Muslim-te enthla ṭha tur leh, burqa khap tura nawrna hi a nawrna a nasa chho hle a ni. Sri Lanka ramah hian mi maktaduai 22 vel awmin, an zinga 10% vel chauh chu Muslim an ni.