Lahore bomb puakah mi 8 an thi

Pakistan-a Lahore khawpui khawchhak lam, Sufi shrine lar tak bulah nimin khan bomb a puak a, mi pariat an thi a, midang 24 in hliam an tuar. 

Kum zabi 11 hunlaia siam, Sufi Muslim-te hmun thianghlim, Data Darbar shrine tlawhtu hmeichhiate luhna gate bulah bomb hi tihpuah a ni. He shrine hi South Asia-a Sufi shrine lian ber zinga mi a ni. Ramchhung hmun hrang hrang aṭanga Sufi Muslim-te chuan he shrine hi an ngaihhluin an tlawh fo a ni. Shrine tlawhtu hi an tam ṭhin vangin firfiakte beih pawh an tawk fo a, kum 2015 khan thihchilh bomb tihpuah a ni tawh bawk a, hemi ṭum hian mi 40 chuang an thi a ni. 

Sufi muslim-te hi Muslim thurin aṭanga kalpengah puh an ni ṭhin  a, Islam firfiakte beih an tawk fo a ni. Islamic State (IS) phei chuan Sufi-ten Muslim mithianglimte thlana sakhaw thil an kalpui dan chu an thurin kalphung pelah an puh. 

Data Darbar shrine bula bomb puaka thi zingah hian police official panga an tel. Bomb tihpuah a nih dan chiah hi hriatchian a la ni lo a, police official Muhammad Kashif chuan thihchilh bomb a ni mai thei tih a sawi. Pawikhawihtute hian security mi leh sate chu an bitum ber nia a lan thu an sawi bawk. Bomb puak hian shrine bula police motor ding pawh a tichhe hneh hle. Nimin aṭang khan Muslim chaw nghei thla, Ramadan a inṭan a, shrine pawh hi tlawhtu an tam hle a ni.