Thailand inthlan result tichhuak Party mala sorkarna siam thei an awm lo

Thailand Election Commission chuan March 24-a inthlanpui an neih result chu hun rei tak a tihkhawtlai hnuah Nilaini zan khan a puang. 

Inthlan result tihchhuahah hian sipai sorkar thlawp, Palang Pracha Rath (PPRP) party chu a dinhmun a ṭha hle a, an party prime minister candidate pawh a tlin leh ngei rin a ni. Mahse party malin sorkarna a siam thei dawn lo a, party tenau dangte a thawhpui a ngai dawn a ni. 

March 24-a inthlan result chhiar lai hian complaint a tam avangin result tihchhuah hun hi tihkhawtlai a ni. Parliament lower house seat 500-ah majority nei pha an awm lo a, eptu pawl Pheu Thai party chu party mala seat la hnem ber a ni a, seat 136 a la. Hetihlai hian PPRP hian seat 115 a la ve bawk. Upper House-a seat 250 awma member-te chu sipai sorkar thlan an nih vangin anni hian PPRP hi an thlawp ngei dawn a, hei vang hian PPRP hian sorkarna a siam zawk rin a ni. 

Prime Minister General Prayuth Chan-ocha chu PPRP PM candidate a ni a, PM a nih chhunzawm leh ngei rin a ni bawk. Parliament upper leh lower house member-te hian prime minister thar tur an thlang dawn a ni. Thailand Parliament in hnihah hian member 750 an awm a, lower house-a seat 500 awma seat 300 chu mipuite thlan an ni a, a bak seat 150 chu inthlana vote hmuh dan azirin party hnenah pek an ni. Upper house-a member 250-te erawh sipai ruat an ni thung. Prime minister hi lower leh upper house member-ten an thlang ṭhin. 

Sorkar thar siam turin PPRP party hian Bhumajaitai emaw Democrat Party emaw a thawhpui rin a ni. Heng party pahnihte hian lower house-ah hian seat 50 chuang an nei a ni. Mahse Democrat party official chuan ṭangrual sorkar siam chungchangah party mite duhdan a in ang lo tih a sawi.