Germany, France, Italy leh Spain-in AstraZeneca vaccine hman titawp

Germany, France, Italy leh Spain sorkar chuan AstraZeneca Covid-19 vaccine latu ṭhenkhatah blood clot a siam nia report a awm avangin he vaccine an hman hi an titawp rih. Mahse heng hi vaccine an lak vang a ni ngei em tih finfiahna erawh a awm lo. 

Kar liam ta khan ram ṭhenkhat chuan AstraZeneca vaccine pek chhuah hi an lo titawp lailawk tawh bawk a, an zingah hian Denmark, Ireland, Thailand, the Netherlands, Norway, Iceland, Congo leh Bulgaria-te an tel. Blood clot hian heart attack, stroke te a thlen thei a, chuap lamah blockage hlauhawm tak a siam thei bawk. 

Hetih lai hian World Health Organi­sation (WHO) chuan he vaccine hman hi a thlawp thung a, blood clot a siam tih report chu finfiahna a awm lo tih a sawi. UN health agency chuan vaccine-in side effect a nei nia report awmte chu an zirchian thu sawiin, mipuite tan chiai phahna tur a awm lo a, vaccine pek chhuah titawp lo turin ram hrang hrangte a ngen a, nimin khan vaccine safety data chungchangah review meeting an nei bawk. 

British-Swedish multinational, AstraZeneca chuan European Union ram leh UK-ah mi maktaduai 17 chuangin an vaccine hi an la tawh tih sawiin, kar liamtaa blood clot case report awm chu 40 aiin a tlem a ni, a ti. European medicine regulator,  Euro­­pean Medicines Agency (EMA) chuan thuchhuah siamin, AstraZeneca vaccine leh trombosis case chuan inzawm­na a nei tih fiahna engmah a awm lo a, he vaccine hi a him tawk a ni, a ti. EMA hian naktukah meeting neiin, hemi chungchanga information an lakkhawmte chu an ngaihtuah dawn a ni. 

Germany health minister Jens Spahn chuan national vaccine regulator, paul Ehrlich Institute thurawn angin AstraZeneca vaccine hman chu an titawp tih a sawi. Institute hian he vaccine latu mi pasarih-ten blood clot an nei tih report a awm avangin vaccine hman hi titawp a, chhui chiang phawt turin a ngen a ni. 

France president Emmanuel Macron pawhin venthawn thilah AstraZeneca vaccine hman chu tihtawp rih a ni tih a sawi a, reiloteah hman chhunzawm leh thuai theih a beisei thu a sawi bawk. Italy medicine authority, AIFA pawhin zirtirtu pakhat chu vaccine a lak hnuah a thih thu leh, a thih dan leh vaccine hian inzawmna a nei em tih expert-ten an chhui chian mek thu sawiin, venthawn thilah an vaccine hman hi tihtawp rih a nih thu a sawi ve bawk a ni. Spain health minister Carolina Darias chuan fimkhur thilah AstraZeneca vaccine pek chhuah chu kar hnih chhung tihtawp a nih thu a sawi bawk.