Myanmar-ah Ei tur leh fuel man a sang chak

United Nations food agency chuan Myanmar-a sipaiten ro an rel hnuah ei tur leh fuel man a sang chak hle tih sawiin, hei hian mipuite  harsatna a tihzual phah hle dawn a ni, a ti. 

World Food Programme (WFP ) chuan February 1-a sipaiten sorkar thuneihna an hnehchhuh hnu aṭang khan thil man a sang chho zel tih sawiin, palm oil man chu Yagon khawpuiah 20% in a sang tawh a, Yangon leh Mandalay-ah buhfai man pawh 4% in a san belh tawh bawk tih a sawi. 

Kachin state-ah chuan buhfai man hi 35% velin a san belh tawh a, cooking oil leh pulse-te chu Rakhine state-ah a sang tawh hle bawk niin WFP chuan a tarlang. February 1 aṭanga ram puma fuel man sanna chu 15%  a tling tawh a, ei tur man pawh a to belh zel bawk. 

WFP chuan thil man hi a san belh zel a nih chuan mi rethei zawkte dinhmun a chhe zual hle dawn niin a sawi. WFP hian kum 10 liam ta aṭang khan Myanmar-ah hian tualchhunga buaina avanga  harsatna tawk, mi 36,000 te a chhawmdawl mek a ni.