US-in NKorea lawng man sak

US chuan North Korea lawng lian, lungalhthei phurtu chu NKorea ram a hrekna palzutah puhin Ningani khan a man. 

NKorea lawng an man hi 'Wise Honest' tih a ni a, United States leh United Nations in an khap chungin dan loin North Korea aṭangin lungalhthei a phur nia sawi a ni. Kum 2018 April thla khan foreign maritime authority chuan he lawng hi a lo man tawh bawk. 

Justice Department chuan an lawng man hi US tuipui chinah hruai mek a nih thu a sawi. He lawng hi ton 17,061-a rit a ni a, North Korea-a hmanraw lian tham phurh luhna atan pawh an hmang fo a ni. UN sanction monitor-te chuan kum 2018-a 'Wise Honest' man a nih khan NKorea aṭangin Indonesia hnena pek tur lungalhthei ton 25,500 a phur tih an sawi. A thil phurh man hi US dollar maktaduai thum man hu vel nia chhut a ni. 

Hetih lai hian NKorea hian Ningani zing khan an ram hmarthlang lam, Kusong bialah short-range missile pahnih a enchhin leh nia sawi a ni. Heng missile-te hi km 420 leh 270-a thui an thlawh hnuah tuipuiah an tla a ni. South Korea President Moon Jae-in chuan NKorea in missile a enchhin lehna chhan chu kumin February thlaa NKorea hotu Kim Jong-un leh US President Donald Trump-ten summit an neih ṭuma  inremna siam thei loa an ṭin avanga a lungawi loh vang a ni, a ti. Mahse hei hi NKorea lam chuan a pha thung a, missile enchhin chu tihdan phung leh mahni invenna tur atana ti an nih tih a sawi thung.