Philippines-in midterm poll nei dawn

Philippines ram chuan vawiin hian midterm poll an nei dawn a, President Rodrigo Duterte kaihhruai sorkar fiahna angah ngaih a ni.

Rampumah legislator leh local executive 18,000 thlan a ni dawn a, vote nei mi maktaduai 61 awmin candidate 43,000 an awm. Congress higher chamber, seat 24 awmah senator 12 thlan a ni dawn bawk. 

Senator candidate zingah President Duterte-an a thlawpte hi inthlan dawna mipui ngaihdan lakah pawh an sang hle a, heng mite hi thlan tlin an nih leh chuan Senate-ah President thlawptu lam hian hneh taka ro relin, Senate-in President laka thu a neihna pawh a tihnep phah rin a ni. 

President Duterte hian thuneihna a chan hnuah an rama ruihhlo umbo tumin nasa takin beihpui a thlak nghal a, ruihhlo zuar leh hmangsualte laka beihpui an thlaknaah hian mi tam tak thah an nih avangin ram dangte sawisel pawh a tawk nasa hle. Hetih lai hian an ram mipuiah chuan a la tla na hle thung a, mipui ngaihdan lak hnuhnung berah pawh President atana Duterte duhtu hi 70% zet an la tling. Tun ṭum inthlan pawh hi a thuneihna sawhnghehna tur anga ngaih zawk hial a ni.