Pakistan-a 5-star hotel beihnaah mi 4 thi

Pakistan port city, Gwadar-ah kar kal ta Inrinni khan ralthuam keng firfiak pathumten 5-star hotel, Pearl Continental (PC) Hotel beiin silai an pawng kah a, mi pali an thi. Thi zingah hian hotel guard pawh a tel. Mi eng emaw zatin hliam an tuar bawk. 

Hotel beitu firfiakte hi anti-terrorism force, Army leh Frontier Corps-ten an bei let nghal a, an pathum hian kahhlum an ni tih hi Balochistan province Home Minister Ziaullah Langov chuan a sawi. Dan pawna hnawl, Balochistan Liberation Army (BLA) chuan hotel beitu an nih thu an sawi a, BLA thupuangtu chuan Majeed Brigade group nena inzawmna nei firfiakten an bei tih a sawi. Tualchhung mite chuan firfiakten luxury hotel an luh hnu hian silai puak ri ṭum eng emaw zat an hriat thu an sawi. 

Gwadar Deputy Commissioner Captain (retd) Mohammad Waseem chuan hotel-a thlengte leh staff-te chu chhanchhuah an nih thu a sawi a, hotel pawh uluk zawka enfiah mek a ni tih an sawi. Firfiakten an beih luxury hotel hi Kohe-Batil hill-a awm a ni a, ramdang mi sumdawng ten thlenna atana an hman fo a ni. Pawikhawihna thlen lai pawh hian ramdang mi eng emaw zat an awm a, mahse hotel-a thlengte hi an him vek tih Balochistan Information Minister Zahoor Buledi chuan a sawi a ni.