Afghan journalist hlui kaphlum

Afghanistan journalist hlui leh Parliament cultural advisor hlui, Mena Mangal-i chu kar kal ta Inrinni khan chhun en laiin Kabul khawchhak lamah kahhlum a ni. 

Mena Mangal-i hian TV network hrang hrang­ah show a nei ṭhin a, a bikin Kabul leh a chhehvelah hriat a hlawh hle. Hemi hnu hian journalism lam kalsanin Parliament cultural advisor-ah a awm a ni. Hmeichhiaten lehkha zir leh hna thawk tura dikna chanvo an neihte chawisan duhtu leh hemi atana thawktu a ni. 

Mangal-i kahhlum a nih chhan leh, a kaptute hi hriat an la ni lo a, eng pawl mahin an tih niin an la chhal lo. Interior ministry thupuangtu Nasrat Rahimi chuan special police unit-in Mangal-i thattute hian an chhui mek thu a sawi. Beih a tawh hma, May 3 khan Mena Mangal-i hian Facebook-ah vauna a dawn thu leh , a hlauh loh thu  a post a, a ram a hmangaih thute a post bawk a ni. Thah a nih hnu hian a nu chuan a thattu nia rinhlelh pawl pakhat hian a hma pawhin a fanu chu an lo rukbo tawh thu a sawi. Heng mite hi man an nih hnuah thamna pein an chhuak zalen leh a ni, a ti.