US-a inkahna thlengah mi 8 an thi Kahhlum zingah Asian American 6 an tel

US-a Georgia state-ah Thawhlehni khan hmun pathumah inkahna a thleng a, mi pariat an thi a, an zinga paruk chu Asian American hmeichhiate an ni. 

Police-te chuan inkahna thlenna hmunte hi spa vek a ni tih sawiin, Acworth-a Youngs Asian Massage Parlor-a inkahnaah mi pali an thi a, north-east Atlanta-a Gold Spa-a inkahnaah mi pakhat pathum an thi a, Aromatherapy Spa-a inkahnaah hmeichhe pakhat kahhlum a ni bawk tih an sawi. South Korea foreign ministry chuan pawikhawihna thlenga thi zinga pali chu South Korea mi an ni tih a sawi.  

Hmun pathuma pawikhawihna thlentu hi mi pakhat vek niin police-te chuan an ngai. Spa pakhata CCTV footage enfiahna aṭangin pawikhawihtu nia hriat hi police-ten an zawng zui nghal a, Woodstock-a cheng kum 21 mi, Robert Aaron chu Atlanta chhim lam km 240 vela hla, Crisp County-ah an man ta a ni. 

Nikuma Covid-19 hripui a len aṭang khan US-ah hian Asian-American te chu hri thehdarhtu nia puha huatna leh enhranna a hluar chho hle. Kut tuar pawh an awm fo a ni. Kar liam ta khan President Joe Biden pawhin Asian-American-te huatna, beihna leh hri leng chungchanga mawhphurtua puhna awm ṭhin chu a dem thu a lo sawi tawh a, hei hi America kalphung a ni lo a, tihtawp a ni tur a ni, tiin a lo sawi tawh. 

Centre for the Study of Hate and Extremism-in nikum chhunga US khawpui lian 16-a zirchianna a neihah, khawpui lian hrang hrangah pawikhawihna thleng hi 7% a tlakhniam laiin, Asia mite laka pawikhawihna thleng erawh kum hmasaah ṭum 49 a thleng a, nikumah chuan ṭum 122 zet a thleng thung a ni. 

Georgia state-ah hian Asian mi 5,00,000 dawn an cheng a, hei hi an state mipui zat aṭanga 4% chuang a ni tih Asian American Advocacy Fund chuan a sawi.