Tanzania President awmna sawichiang turin sorkar phut

Tanzania president John Magufuli chu kar thum dawn mipui hmuhah inlan tawh loin, a awmna chin hriat a ni lo a, hei vang eptu party chuan President awmna leh a dinhmun hi sawichiang turin sorkar hi an phut. 

Magufuli hi mipui hmuha a inlan hnuhnung ber chu February 27 kha niin, hemi hnu hian hmuh zui a ni lo. Report ṭhenkhat chuan kum 61 mi, President hi Covid-19 a kai niin an sawi a, Kenya hospital-ah enkawl a nih hnuah India ramah phurh a ni, an ti. 

Mahse Prime Minister chuan President hi a hrisel ṭha a, hna pawh a thawk reng niin kar liam ta khan a sawi a, hna thawh tur a ngah lutuk a ni, a ti.  Vice president Samia Suluhu Hassan pawhin President a dam ṭha lo nia sawi chu a pha bawk. 

Eptu pawl lian ber,  Alliance for Change and Transparency (ACT Wazalendo) chuan Thawhlehni khan thuchhuah siamin, mipuite chuan hun rei tak President awmna chin an hriat tawh loh avangin an chiai tawh hle a ni, an ti. President dinhmun dik tak chu mipuite hriatah puang turin sorkar an phut tih an tarlang. Hei bakah hian President hriselna chungchang an sawi avanga mante chu chhuah vek turin an phut bawk.