Sri Lanka-in Facebook leh WhatsApp a block

Sri Lanka-a Easter Sunday-a Kristiante biak-in leh luxury hotel beih a ni hnuah social media lama thu post avanga Muslim-ten beih an tawh avangin nimin aṭang khan ram pumah Facebook leh WhatsApp-te chu hman theih lohin block a ni. 

Pathiannia Muslim dawrkai pakhatin Facebook-a a thu post chuan Kristiante a ti thinrim a, hei vang hian Chilaw khuaa Muslim-te dawr ho chu Kristian pawl ṭhenkhatin an suasam sak tih police-ten an sawi. Security force-te chuan buaina siamtute hnawhdarh nan silaite an hmetpuak a, mahse tharum thawhna hian khaw dang a kang kai hman a, hmun tam takah Muslim-te dawr leh sumdawnna hmunte beih zui an ni. 

Police-te chuan Pathianni zan khan Chilaw leh a chhehvel bialah curfew puan nghal a ni tih an sawi. Mahse nimin khan curfew hi thlah dul a ni a, social media erawh hman theih lohin khap a ni thung. Pathiannia Muslim dawrkai pakhatin Facebook-a a post, " Nui tawh suh u, in la ṭap leh ngei ang" a tih chu tualchhunga Kristiante chuan Kristiante beih an tum lehna angah ngaiin an hua a ni. Kristian-te hi inpunkhawmin he thu post tu dawr leh a bula mosque chu an suasam zui nghal a ni. 

Islam sakhaw hruaitu pawl, All Ceylon Jammiyathul Ulama (ACJU) chuan ramchhunga Islam firfiakten Easter Sunday-a pawikhawihna an thlen hnu khan Muslim-te rinhlelhna a zual phah hle tih an sawi. Hei vang hian Muslim mite chu insum leh dawhthei taka awm turin an ngen a, social media lamah chuan thil ṭul pawimawh chauh post a, thu lak kawih theih chi lam post lo turin an ngen. 

Easter Sunday-a fir­fiakte pawikhawihna a thlen hnuah Sri Lanka hi state of emergency hnuai­ah a la awm a, security force leh police-te chuan pawi­khawihnaa inhnamhnawiha rinhlelhte chu thubuai siamsak kher loin man theihna leh hun rei tak hren zui theihna an nei a ni. 

Sri Lanka ram mipui tam ber chu Buddist an ni a, Muslim hi 10% an awm a, Kristian 7.6% an awm bawk.