Sudan president hlui tualthah thubuai siamsak

Sudan President hlui Omar al-Bashir chu thuneihna a chan laia sorkar laka lungawi lohna lantir a nawrh huaihawt mi eng emaw zat thah an nih chungchangah tualthah thubuai siamsak a ni. 

Prosecutor general chuan Thawhṭanni khan al-Bashir laka thubuai siamsak a nih chungchang hi a puang a, "Omar al-Bashir leh a thurualpuite chu nawrh huaihawtte thah an nihna tura mi fuihpawrh leh he pawikhawihnaa telah puh an ni," a ti. Tun thla tir lam khan prosecutor general hian al-Bashir chu dik lo taka sum khawih leh firfiaka chete sum hmanga puia puh a nih chungchangah thu zawtfiah turin a lo ti tawh  bawk. 

April 11 khan al-Bashir hi president a nihna aṭanga paih­thlak a nih hnuah man a ni a, Khartoum-a Kobar taninah a tang mek a ni. Nikum December thla aṭanga al-Bashir duh lohna lantira nawrh huaihawt a nih aṭang khan an zinga mi 100 vel chu security force-te silai hmehpuahah an thi nia sawi a ni. Thi zinga tam tak hi security force-te silai hmehpuah hlaua tlanchhia, silai muin a fuh takte an ni. President hlui hi kumin January thlaa nawrh huaihawtna hmuna hliam tuarte ṭanpui tura kal, kum 27 mi Dr. Babiker Salama kahhlum a nih chungchangah mawhphurtua puh a ni bawk. 

Al-Bashir leh a kaihhruai sorkar paihthlak a nih hnu hian sipaite chuan thuneihna an chelh zui a, mahse mi tam takin civil sorkar din turin an nawr a, Khartoum-a sipai headquarters bulah mi eng emaw zat an inkulh mek bawk. Sipai hotute hian civil sorkar hnena thuneihna hlan tur chuan kum hnih tal a ngai dawn tih an sawi a, mahse nawrh huai­hawttute chuan hemi buaipui chhung leh inthlan neih hunah pawh civil mite kutah thuneihna pumhlum dah an phut a ni.

Rorelna chelh mektu, Mi­litary Council-a thupuangtu Lieutenant-General Shams al-Din Kabashi chuan nawrh huaihawt mek- Declaration of Freedom and Change Forces (DFCF) hotute chu civil sorkar siam a nih dan tur sawipuiin Thawhṭanni khan sipai hotute nen an inhmu tih a sawi.