Sri Lanka-in ram pumah curfew puang
Sri Lanka sorkar chuan tualchhung buaina chhuak vangin Thawhṭanni zan khan ram pumah curfew a puang a, nimin zing khan hlih leh nghal a ni.
Sri Lanka khawpui, Colombo khawpui daia buaina a chhuah hnuah North Western Province-ah a chhuak zui ve leh a, hei vang hian Thawhṭanni zan dar 9 aṭang khan ram pumah curfew puan a ni.
Muslim mi dawrkai pakhatin a Facebook-ah Kristiante beih tumna lam hawi zawng nia ngaih theih thu a post avangin Kurunegala district-a khaw hrang hrangah buaina a chhuak a, Muslim mite dawr, in leh mosque-te an suasam a ni. Muslim mite beihna thlengah hian thingzai dawr neitu pakhat a thi a, midang eng emaw zatin hliam an tuar bawk. Hei vang hian he bial chhungah hian curfew puan nghal a ni a, venhimna lam pawh khauh taka kalpui nghal a ni bawk. Mahse buaina hian hmundang a kangkai hman a, Thawhṭanni tlai lam khan Gamaha-ah dawr leh in eng emaw zat chu mipui thinrimin an suasam leh a ni.
Sri Lanka Prime Minister Ranil Wickeremesinghe chuan mipuite chu inbengdai turin a ngen a, thu dik lo thehdarh ṭhinte chu inbumtir lo turin a ti.