China ram pawn lamah Covid-19 kai mi 12,600 awm tawh
World Health Organization (WHO) chuan China ram pawn lamah Covid-19 vei thar mi 2,100 an awm thar tih sawiin, he natna hri kai hi 12,600 an chuang tawh tih nimin khan a sawi.
US-ah chuan he hri vang hian mi 11 an thi tawh. Thi zinga pakhat hi California state ami niin, a dangte hi Washington state ami vek an ni. California Governor Gavin Newsom chuan an state chhunga Covid-19 vanga thi an awm hnu Nilaini khan state pumah emergency a puang nghal a ni.
US Congress chuan Covid-19 leng mek do letna turin emergency funding package, dollar tluklehdingawn 8.3 a pawm tawh bawk. Nimina report-a lan danin, Covid-19 hi ram 85-ah a darh tawh a, a kai finfiah tawh hi mi 95,512 awmin, mi 3,286 in an thihpui tawh a ni. Thi zinga mi 3,013 hi China ram ami an ni a, Italy-ah mi 107 leh Iran-ah mi 92 in an thihpui tawh bawk. Nimin bikah khan China-ah Covid-19 vanga thi hi mi 32 an awm a, ram dangah erawh thi an awm lo nia hriat a ni.
Covid-19 vanga thi hi a kai zat aṭanga 3.4% an tling. Mahse WHO chuan he hri leng mek hi lo rin lawk aia hlauhawm zawk ni mah se khauhkhirh leh thunun theih a ni tih a sawi. Hei vang hian ram hrang hrangte chu hri darh zel tur khuahkhirhna kawnga theihtawp chhuah zel turin a ngen.
Italy-ah school khar
Italy sorkar chuan Nilaini aṭang khan hri leng vang hian an rama school leh university-te chu march 15 thleng khar turin thupek a tichhuak. South Korea pawhin March 23 thleng school khar turin a hriattir tawh bawk. China tih lohah South Korea hi Covid-19 vei tamna ber niin, mi 6,000 dawnin an vei tih finfiah a ni.
Japan prime minister Shinzo Abe thupek angin, Japan rama school-te pawh March thla chhung khar tir an ni bawk. France ramah pawh hri kai tamna biala school 120-te chu tunkar chhung atan khar tir an ni bawk. Hri leng vanga ram eng emaw zatin zirna in an khar avang hian zirlai naupang maktaduai 290 vel zet a nghawng a ni.