Ukraine President-in Prime Minister thar a ruat

Ukraine parliament-in a pawmpui hnuah Ukraine president Volodymyr Zelensky chuan an ram prime minister thar atan Denis Shmygal chu Nilaini khan a ruat.

PM thar Shmygal hian a hna hi a chelh hmain Ivano-Frankivsk Oblast khuaah Governor hna chu nikum August 1 aṭang khan a chelh a, kumin February 4 khan Minister of Regional Development hna a chelh leh bawk a ni. Shmygal hi Ukraine prime minister pathumna a ni.

"Sorkar hmasa khan ṭha takin hna a thawk a, mahse vawiin chuan kan ram hian thil theih loh nia miten an sawi ti thei tu sorkar thar a mamawh a ni. Kan sorkar thara cabinet minister turte hian heng thil theih lo nia miten an sawi hi an tih theih ngei ka beisei," tiin president Zelensky chuan PM thar an neih chungchang a sawi. 

Thawhlehni khan PM kalchhuak ta, Oleksiy Honcharuk hian a hna aṭanga a banna hi President hnenah hian a thehlut a, Nilainia parliament-a uluk taka ngaihtuah a nih hnuah a ban hi rem tih a ni a, President-in a pawmpui hnuah ban zui a ni ta a ni. 

Ukraine media-te sawi dan chuan president Zelensky hian PM kalchuak ta Honcharuk-ah hian rinna a nghat ngam tawh lo niin an sawi a, hei hi a chhan chu Honcharuk-a kaihhruai sorkar khan duh angin an ram an siam ṭha thei tawk lo niin an sawi.