UN-in Myanmar sipai nena inzawmna titawp turin ngen

United Nations fact-finding mission chuan ram hrang hrangte chu Myanmar sipaite, sum leh thil dang hmanga an thawhpuina titawp turin a ngen. Hemi rual hian Myanmar sipai hotute chu Rohingya Muslim-te beih an nih chungchangah thubuai siamsak a phut bawk. 
Kum 2017 August thla aṭanga Rakhine state-a Rohingya Muslim-te laka beihpui thlaknaah mi tam tak thatah te, pawngsual leh an in leh lo halsakahte Myanmar sipaite hi puh an ni. 

Mahse Myanmar sorkar chuan a sipaite puhna hrang hrang hi a pha thung a, nikum September thlaa UN panel-in Rohingya mite laka sipaite chet dan chungchang report a tihchhuah pawh a hnawl a ni. Australian human rights lawyer leh panel member Christopher Sidoti chuan Bangladesh rama tlanchhia, Rohingya raltlante an khaw lama him laka hruai kir leh an nih theihna tur leh, an harsatna chinfel sakna turin Myanmar sorkarin hma a lak tak takna hmuh tur a awm lo tih a sawi. Myanmar sorkar chuan expert-ten an ram an tlawh hi a khap a, mahse tun thla tir lam khan Bangladesh-a raltlante awmna Cox's Bazar district an tlawh thung a ni.